హైదరాబాద్‌ చేరుకున్న మాయావతి : నేతల ఘనస్వాగతం

హైదరాబాద్ : బీఎస్పీ అధినేత్రి మాయావతి హైదరాబాద్‌ చేరుకున్నారు. సుదీర్ఘ
విరామం తర్వాత భాగ్యనగరానికి వచ్చిన ఆమెకు ఆ పార్టీ రాష్ట్ర నాయకత్వం ఘన
స్వాగంతం పలికింది. అనంతరం బీఎస్పీ రాష్ట్ర అధ్యక్షుడు ఆర్‌ఎస్‌
ప్రవీణ్‌కుమార్‌, ముఖ్య నేతలతో ఆమె కాసేపు మాట్లాడారు. సుదీర్ఘ విరామం తర్వాత
బీఎస్పీ అధినేత్రి మాయావతి హైదరాబాద్‌ నగరానికి వచ్చారు. ప్రస్తుతం కర్ణాటక
శాసనసభ ఎన్నికల ప్రచారంలో ఉన్న ఆమె బెంగళూరు నుంచి ఈ సాయంత్రం ప్రత్యేక
విమానంలో బేగంపేట విమానాశ్రయానికి చేరుకున్నారు. విమానాశ్రయంలో ఆమెకు ఆ పార్టీ
రాష్ట్ర అధ్యక్షుడు ఆర్‌ఎస్‌ ప్రవీణ్‌ కుమార్‌తో పాటుగా బీఎస్‌పీ తెలంగాణ
రాష్ట్ర ఇంఛార్జీ, రాజ్యసభ సభ్యుడు రాంజీ గౌతమ్, రాష్ట్ర చీఫ్ కో-ఆర్డినేటర్
మంద ప్రభాకర్, చంద్రశేఖర్ ముదిరాజ్ తదితర ముఖ్య నేతలు ఘన స్వాగతం పలికారు.
విమానాశ్రయానికి చేరుకున్న పార్టీ కార్యకర్తలు, అభిమానులు మాయావతి రాక కోసం
ఎదురు చూశారు. మాయవతి కారులో వారికి అభివాదం చేసుకుంటూ రోడ్డు మార్గం ద్వారా
బంజారాహిల్స్‌లోని పార్కు హయాత్‌ హోటల్‌కు చేరుకున్నారు. అక్కడ ఆ పార్టీ
నేతలతో తెలంగాణలో తాజా రాజకీయ పరిస్థితుల గురించి విస్తృతంగా చర్చించారు.
రాష్ట్రంలో బహుజన్ సమాజ్ పార్టీ కార్యక్రమాల వివరాలపై ఆరా తీశారు. ఆదివారం
సాయంత్రం సరూర్‌నగర్ మైదానంలో చేపట్టిన తెలంగాణ భరోసా యాత్ర నిర్వహణ ఏర్పాట్ల
గురించి అడిగి తెలుసుకున్నారు. తెలంగాణ అసెంబ్లీ ఎన్నికలు సమీపిస్తుండటంతో ఆ
పార్టీ కార్యచరణను నేతలతో కలిసి చర్చించారు.