హైదరాబాద్ : ఇటీవల తీవ్ర గుండెపోటుకు గురైన నందమూరి తారకరత్న బెంగళూరు
ఆసుపత్రిలో చికిత్స పొందుతూ కన్నుమూసిన సంగతి తెలిసిందే. కాగా తారకరత్న పెద్ద
కర్మ కార్యక్రమం గురువారం హైదరాబాదులో నిర్వహించారు. ఈ కార్యక్రమానికి టీడీపీ
అధినేత చంద్రబాబు హాజరయ్యారు. తారకరత్న చిత్రపటానికి నివాళులు అర్పించారు.
వైసీపీ ఎంపీ విజయసాయిరెడ్డి కూడా తారకరత్న దశ దిన కార్యక్రమానికి హాజరు కాగా
చంద్రబాబు ఆయనతో కరచాలనం చేసి క్లుప్తంగా మాట్లాడారు. అనంతరం తారకరత్న కుటుంబ
సభ్యులను పరామర్శించారు. ఈ కార్యక్రమానికి బాలకృష్ణ, ఇతర నందమూరి కుటుంబ
సభ్యులు హాజరయ్యారు.
తారకరత్న దశ దిన కార్యక్రమంలో ఎన్టీఆర్ భావోద్వేగ నివాళి
అటు అభిమానులను, ఇటు కుటుంబ సభ్యులను తీవ్ర విషాదంలో ముంచెత్తుతూ నటుడు
నందమూరి తారకరత్న ఇటీవల కన్నుమూశారు. కుప్పంలో నారా లోకేశ్ యువగళం పాదయాత్ర
ప్రారంభ కార్యక్రమంలో పాల్గొన్న తారకరత్న గుండెపోటుతో కుప్పకూలిపోగా, 23 రోజుల
పాటు బెంగళూరు నారాయణ హృదయాలయ ఆసుపత్రిలో మృత్యువుతో పోరాడి తుదిశ్వాస
విడిచారు. కాగా ఆయన పెద్ద కర్మ నేడు హైదరాబాదులో నిర్వహించారు. ఈ
కార్యక్రమానికి నందమూరి కుటుంబ సభ్యులు జూనియర్ ఎన్టీఆర్, కల్యాణ్ రామ్
తదితరులు హాజరయ్యారు. జూనియర్ ఎన్టీఆర్ తన సోదరుడు తారకరత్నకు భావోద్వేగ అంజలి
ఘటించారు. తారకరత్న చిత్రపటం ముందు శిరసు ఆన్చి నివాళి అర్పించారు.
