నేపాల్‌ కొండల్లో విషాదం మిగిల్చిన ‘విమాన ప్రమాదాలు

నేపాల్‌లో చోటుచేసుకున్న ఘోర విమాన ప్రమాదంలో మృతుల సంఖ్య క్రమంగా
పెరుగుతోంది. దుర్ఘటన సమయంలో మొత్తం 72 మంది ప్రయాణికులు ఉన్నారు. అయితే,
ఇటువంటి ప్రమాదాలు నేపాల్‌లో సర్వసాధారణంగా మారిపోయాయి.

అక్కడ కొన్నేళ్లుగా చోటుచేసుకున్న కొన్ని విమాన
ప్రమాదాలను ఓసారి పరిశీలిస్తే.2023 జనవరి 15: నేపాల్‌ రాజధాని కాఠ్‌మాండూ నుంచి కాస్కీ జిల్లాలోని పొఖారాకు
వెళ్తోన్న యతి ఎయిర్‌లైన్స్‌ నేల కూలిపోయింది. ఈ దుర్ఘటన సమయంలో అందులో 72మంది
ఉన్నారు. ఇప్పటివరకు 40 మృతదేహాలను వెలికి తీయగా మరిన్ని వాటికోసం సహాయక
చర్యలు కొనసాగుతున్నాయి.

2022 మే 29: తారా ఎయిర్‌లైన్స్‌కు చెందిన ఓ విమానం ఘోర ప్రమాదానికి
గురయ్యింది. అందులో మొత్తం 22 మంది ప్రాణాలు కోల్పోయారు. ముత్సాంగ్‌
జిల్లాలోని కొండలను ఢీకొట్టడంతో జరిగిన ఆ ప్రమాదంలో నలుగురు భారతీయులు, ఇద్దరు
జర్మన్‌ దేశీయులు కూడా చనిపోయారు.

2016 ఫిబ్రవరి 24: ఇదే విమానయాన (తారా) సంస్థకు ఓ విమానం గతంలోనూ ఇదే మార్గంలో
ప్రమాదానికి గురయ్యింది. ముత్సాంగ్‌ జిల్లాలో జరిగిన ఆ ఘటనలో అందులో
ప్రయాణిస్తోన్న మొత్తం 23 మంది ప్రాణాలు కోల్పోయారు.

2018 మార్చి 12 : కాఠ్‌మాండూలోని త్రిభువన్‌ అంతర్జాతీయ విమానాశ్రయం సమీపంలో
దారుణ ప్రమాదం చోటుచేసుకుంది. బంగ్లాదేశ్‌ ఎయిర్‌లైన్స్‌కు చెందిన ఓ విమానం
కుప్పకూలిపోయింది. దట్టమైన మేఘాల కారణంగా జరిగిన ఆ దుర్ఘటనలో మొత్తం 51 మంది
మృత్యువాతపడ్డారు.
2014 ఫిబ్రవరి 16 : ప్రతికూల వాతావరణం కారణంగా జరిగిన ఓ విమాన ప్రమాదంలో
18మంది చనిపోయారు.
2012 సెప్టెంబర్‌ 28: సీతా ఎయిర్‌లైన్స్‌కు చెందిన విమానం త్రిభువన్‌
విమానాశ్రయంలో అత్యవసరంగా దిగేందుకు ప్రయత్నించింది. అప్పుడు చోటుచేసుకున్న
ప్రమాదంలో 19మంది ప్రాణాలు కోల్పోయారు.

2012 మే 14: పొఖారా నుంచి జామ్సమ్‌కు వెళ్తోన్న ఓ విమానం జామ్సమ్‌
ఎయిర్‌పోర్టుకు సమీపంలో ప్రమాదానికి గురయ్యింది. ఆ ఘటనలో 15 మంది చనిపోయారు.
2011 సెప్టెంబర్‌ 25: ఎవరెస్ట్‌ శిఖరాన్ని చూసేందుకు విదేశీ పర్యాటకులను
తీసుకెళ్తోన్న ఓ చిన్న విమానం ప్రమాదానికి గురయ్యింది. అందులో ప్రయాణిస్తోన్న
19 మంది ప్రాణాలు కోల్పోయారు.

2010 డిసెంబర్‌ 16: తూర్పు నేపాల్‌లో చోటుచేసుకున్న ప్రమాదంలో 22మంది
మృత్యువాతపడ్డారు. అంతకుముందు అదే ఏడాది ఆగస్టు 24న జరిగిన ప్రమాదంలో 12 మంది
చనిపోయారు. అందులో నలుగురు అమెరికన్లు, బ్రిటన్‌, జపాన్‌ దేశస్థులు కూడా
ఉన్నారు.

2008 అక్టోబర్‌ 8: ఈశాన్య నేపాల్‌లో ఓ ప్రైవేట్‌ విమానం కుప్పకూలింది. ఆ
ప్రమాదంలో 18 మంది చనిపోగా.. అందులో ఎక్కువగా విదేశీయులే ఉన్నారు.
వీటితోపాటు కొన్ని హెలికాప్టర్‌ ప్రమాదాలు కూడా చోటుచేసుకున్నాయి.

2019 ఫిబ్రవరి 27: తూర్పు నేపాల్‌లోని కొండల ప్రాంతంలో ఓ హెలికాప్టర్‌
ప్రమాదానికి గురయ్యింది. అందులో పర్యాటక శాఖ మంత్రితోసహా ఏడుగురు చనిపోయారు.
2016 మార్చి 12: పశ్చిమ నేపాల్‌లోని కాలీకోట్‌ జిల్లాలో ఓ చిన్న విమానానికి
జరిగిన ప్రమాదంలో ఇద్దరు చనిపోయారు.