అమరావతి : శక్తి స్వరూపిణి స్త్రీ.. బహుకృత రూపిణి స్త్రీ.. బహుముఖ
ప్రజ్ఞాశాలి స్త్రీ.. మానవ సృష్టికి మూలకారిణి స్త్రీ.. ఇంతటి మహోన్నతమైన
స్త్రీకి మనం ఏమిస్తే రుణం తీరుతుంది. తల్లిగా.. తోబుట్టువుగా.. భార్యగా..
బిడ్డగా.. భిన్నరూపాలలో మన మధ్య ఉన్న స్త్రీమూర్తి సేవలు వెల కట్టలేనివి.
మహిళామణి లేని ఇల్లు దీపం లేని కోవెల వంటిదని జన సేన పార్టీ అధినేత పవన్
కళ్యాణ్ అన్నారు. ఇంతటి మహత్తరమైన వనితా లోకానికి మహిళా దినోత్సవ
శుభాకాంక్షలు తెలిపారు. ఎక్కడ స్త్రీలు గౌరవించబడతారో అక్కడ దేవతలు కొలువై
ఉంటారని మనం చెప్పుకొంటుంటాము. అది సత్యం. స్త్రీలను గౌరవించే చోట
శాంతిసౌభాగ్యాలు విలసిల్లతాయని నేను ధృడంగా విశ్వసిస్తాను. అయితే స్త్రీ
సంపూర్ణ సాధికారిత సాధించడానికి, వారు స్వేచ్ఛగా జీవించడానికి మన సమాజం,
ప్రభుత్వాలు ప్రత్యేక దృష్టి సారించాల్సి ఉంది. మహిళలపై అఘాయిత్యాలు జరగని
సమాజం ఆవిష్కృతం కావడానికి పకడ్బందీ చర్యలు చేపట్టాలి. స్త్రీ ఆర్థిక
స్వావలంబనతో స్వశక్తిపై నిలబడలన్నా, సాధికారిత సాధించాలన్నా చట్ట సభలలో వారి
సంఖ్యా బలం పెరగవలసి ఉందని నేను ప్రగాఢంగా నమ్ముతాను. చట్టసభలలో మహిళలకు 33
శాతం రిజర్వేషన్ కల్పించాలని జనసేన డిమాండ్ చేయడంతోబాటు ఈ అంశాన్ని మా పార్టీ
ఎన్నికల ప్రణాళికలో పొందుపరిచిన విషయం ఆడపడుచులు అందరికీ విదితమే. ఈ దిశగా నా
రాజకీయ ప్రయత్నం చిత్తశుద్ధితో కొనసాగుతుందని మీకు సవినయంగా విన్నవిస్తూ
మహిళామణులందరికీ శుభాలు కలగాలని మనస్ఫూర్తిగా ఆకాంక్షిస్తున్నానని జన సేన
అధినేత పవన్ కళ్యాణ్ పేర్కొన్నారు.
