భూసర్వే వేగవంతం

ముఖ్యమంత్రి వైఎస్ జగన్ మోహన్ రెడ్డి

ఖాళీలుంటే తక్షణమే భర్తీ చేయండి

వైఎస్‌ఆర్‌ జగనన్న శాశ్వత భూహక్కు, భూరక్ష పథకంపై సీఎం జగన్ మోహన్ రెడ్డి

అమరావతి : రాష్ట్రంలో చేపట్టిన సమగ్ర భూసర్వే ప్రక్రియను మరింత వేగవంతంగా చేపట్టాలని అధికారులను ముఖ్యమంత్రి వైఎస్ జగన్ మోహన్ రెడ్డి ఆదేశించారు. భూముల రీ-సర్వే అత్యంత ప్రతిష్ఠాత్మక కార్యక్రమమని, సర్వే ఖచ్చితంగా నాణ్యతతో జరగాలని నిర్దేశించారు. భూగర్భ గనుల శాఖ అధికారులు సర్వే రాళ్ల ఉత్పత్తి పెరిగేలా అదనపు ఏర్పాట్లు చేసుకోవాలని సూచించారు. వైఎస్‌ఆర్‌ జగనన్న శాశ్వత భూహక్కు, భూరక్ష పథకంపై సీఎం జగన్ మోహన్ రెడ్డి సోమవారం సమీక్షించారు. ఈ సందర్భంగా సీఎం జగన్‌ మాట్లాడుతూ దాదాపు వందేళ్ల తర్వాత మరలా భూసర్వే చేస్తున్నామని వాటి ఫలాలు కచ్చితంగా ప్రజలకు అందాలన్నారు. తొలి విడతలో సర్వే పూర్తయిన 2 వేల గ్రామాలకు సంబంధించి భూహక్కు పత్రాలు అందించే కార్యక్రమాన్ని జనవరి నాటికి పూర్తిచేయాలని అధికారులను ఆదేశించారు. తొలి విడతలో 19వేల భూవివాదాలను పరిష్కారమయ్యాయని ఫలితంగా ప్రజలకు రూ.37.57 కోట్ల మేర ఆదా అయ్యిందని అధికారులు సీఎంకు వెల్లడించారు. మరో 2వేల గ్రామాల్లో రీసర్వే ప్రక్రియకు సంబంధించి కార్యాచరణ ప్రణాళికను వివరించారు. 2023 ఫిబ్రవరి 15 నాటికి సర్వే పూర్తి చేస్తామని, అదే నెల చివరికల్లా భూహక్కు పత్రాలను కూడా అందజేస్తామని వెల్లడించారు. సమగ్ర సర్వే కార్యక్రమం సకాలంలో పూర్తి చేయడానికి అవసరమైన సిబ్బంది కొరత లేకుండా చూసుకోవాలని అధికారులకు సీఎం సూచించారు.

ఖాళీలుంటే భర్తీ చేయండి : రాష్ట్రవ్యాప్తంగా ఉన్న అన్ని గ్రామ, వార్డు సచివాలయాల్లో కావల్సినంత మంది సిబ్బంది ఉండేలా చర్యలు తీసుకోవాలని సీఎం జగన్‌ ఆదేశించారు. దీని కోసం సచివాలయాన్ని యూనిట్‌గా తీసుకోవాలని, ఖాళీలున్న చోట వెంటనే నియామకాలు చేపట్టాలన్నారు. 22ఏ సమస్య పరిష్కరించి హక్కు పత్రాలు అందజేసిన లబ్ధిదారులకు లేఖలు రాయాలని అధికారులకు సీఎం ఆదేశించారు. ఏళ్ల తరబడి పెండింగ్‌లో ఉన్న సమస్యలను పరిష్కరించి వారికి జరిగిన మేలును తెలియజేసేలా.. లబ్ధి పొందిన ప్రతి వారికి వ్యక్తిగతంగా లేఖ రాయాలన్నారు. సర్వే రాళ్లపైనా సీఎంకు అధికారులు వివరాలు అందించారు. సర్వే రాళ్ల ఉత్పత్తి వేగం పెంచాలని, సమగ్ర భూసర్వే ప్రక్రియను మరింత వేగవంతంగా చేపట్టాలని సీఎం ఆదేశించారు. భూగర్భ గనుల శాఖ అధికారులు సర్వే రాళ్ల ఉత్పత్తి పెరిగేలా అదనపు ఏర్పాట్లు చేసుకోవాలన్నారు. మార్చి కల్లా సర్వేకు అవసరమైన రాళ్లు సిద్ధంగా ఉంచుతామని అధికారులు తెలిపారు. ఇందుకోసం అవసరమైన ప్రొడక్షన్‌ కెపాసిటీనీ మైనింగ్‌ శాఖ పెంచుకోవాలని, ఇందులో ఎలాంటి జాప్యానికి తావుండరాదని సీఎం జగన్ అధికారులకు సూచించారు.