దేశ రాజకీయాలలో స్టాలిన్ ?

చెన్నై : తమిళనాడు ముఖ్యమంత్రి ఎం కే స్టాలిన్ ఢిల్లీ వేదికగా నరేంద్ర మోడీని
ఢీ కొట్టాలని చూస్తున్నారు. ఈ నేపధ్యంలో ఆయన ఇరవై ఒక్క పార్టీలతో ఒక భారీ
సమావేశాన్నే ఏర్పాటు చేశారు. చిత్రమేంటి అంటే ఈ మీటింగ్ కి కేసీయార్ కి
ఆహ్వానం పంపారు కానీ ఏపీ నుంచి జగన్ కి చంద్రబాబులకు ఇన్విటేషన్ లేదని ప్రచారం
సాగుతోంది. అంటే స్టాలిన్ ఏపీలో రెండు ప్రధాన పార్టీలూ యాంటీ బీజేపీ కూటమికి
దూరం అని భావిస్తున్నారా అన్నదే చర్చగా ఉంది. అయితే రాజకీయాల మీద ఆ మాత్రం
అవగాహన ఉన్న వారికి అర్ధమయ్యే విషయం ఏంటి అంటే కేంద్రంలో ని బీజేపీ కి వైసీపీ
టీడీపీ మిత్రులుగానే ఉన్నాయని. ఈ రెండు పార్టీలు గత నాలుగేళ్ల కాలంలో మోడీని
కానీ ఆయన పాలనను కానీ పల్లెత్తు మాట అనకుండా నెట్టుకుని వస్తున్నాయి. అదే టైం
లో మోడీ సర్కార్ ప్రవేశపెట్టే ప్రతీ బిల్లుకూ వైసీపీ టీడీపీ మద్దతుగా
నిలుస్తున్నాయి. దేశంలో ఏమి జరిగినా మోడీ మీద విపకాలు విరుచుకుపడినా ఈ రెండు
పార్టీలు మాత్రం మౌన ముద్రతోనే ఉన్నాయి. ఒక్క మాటలో చెప్పుకోవాలీ అంటే
బీజేపీతో పరోక్ష దోస్తీని ఈ పార్టీలు చేస్తున్నాయని అంతా నమ్ముతున్నారు. పైగా
జాతీయ రాజకీయాలు తమకు పట్టవని తేల్చి చెప్పేస్తున్నాయి. ఏపీలో మరోసారి
అధికారాన్ని నిలబెట్టుకునే పనిలో వైసీపీ ఉంటే చంద్రబాబు ఎలాగైనా ఈసారి
అధికారంలోకి రావాలని చూస్తున్నారు. 2018లో బీజేపీతో తెగదెంపులు చేసుకున్న
టీడీపీ ఆ తరువాత ఓటమిని ఏపీలో చవి చూసింది. ఈసారి ఆ తప్పు చేయకూడదు
అనుకుంటోందని టాక్. వైసీపీ విషయానికి వస్తే ఆ పార్టీ కూడా బీజేపీ అండ
కేంద్రంలో దన్ను ఉంటేనే ఏపీలో మళ్లీ విజయం అని నమ్ముతోంది. ఇలా ఈ రెండు
పార్టీల తీరు ఉండబట్టే స్టాలిన్ నుంచి ఆహ్వానం రాలేదని అంటున్నారు. విశేషం
ఏంటి అంటే జగన్ సీఎం గా ప్రమాణం చేసినపుడు ముఖ్య అతిధిగా స్టాలిన్ వచ్చారు.
అలాగే స్టాలిన్ తో చంద్రబాబుకు మంచి రిలేషన్స్ ఉన్నాయి. అయినా సరే ఏపీ వైపు
స్టాలిన్ కన్నెత్తి చూడలేదు అంటే ఇక్కడ పాలిటిక్స్ ని ఆయన బాగా అర్ధం
చేసుకుననరని అంటున్నారు. ఇంకో వైపు చూస్తే బీయారెస్ కి ఆహ్వానం అందింది. కానీ
ఆ పార్టీతో దోస్తీ చేస్తున్న కర్నాటక జేడీఎస్ కి ఇన్విటేషన్ లేదు. కేసీయార్
అయితే ఈ సమావేశానికి వెళ్ళడంలేదు తన పార్టీ తరపున రాజ్యసభ ఎంపీ కె కేశవరావుని
పంపిస్తున్నారు. ఇక దేశంలో కీలకంగా ఉన్న ఇరవ ఒక్క పార్టీలను స్టాలిన్
ఆహ్వానించారు. ప్రధాని నరేంద్ర మోడీకి వ్యతిరేకంగా విపక్ష పార్టీలను ఏకీకృతం
చేయాలన్నది స్టాలిన్ ఆలోచనగా ఉంది. దానికి సన్నాహకంగా ఈ మీటింగ్ అని
అంటున్నారు.