జనసేన అధ్యక్షుడు పవన్ కళ్యాణ్
విజయవాడ : దేశంలో కుల సమస్య, కులాలపై శాస్త్రీయ అవగాహన..వాటి
పుట్టుపూర్వోత్తరాలు సాంస్కృతిక జీవనం గురించి సాధికారికంగా విశాల దృక్పథంతో
మాట్లాడిన మహనీయులు శ్రీ రామ్ మనోహర్ లోహియా అనిజనసేన అధ్యక్షుడు పవన్ కళ్యాణ్
అన్నారు. ఆయన ప్రతిపాదించిన సోషలిస్ట్ సిద్ధాంతాలను అర్థం చేసుకొంటే అన్ని
వర్గాల ప్రజలు సామరస్య భావనతో ముందుకు వెళ్తారు. సమసమాజ స్థాపన కోసం తపించిన ఆ
మహానుభావుడి జయంతి సందర్భంగా హృదయపూర్వక అంజలి ఘటిస్తున్నాను. జనసేన పార్టీ
సిద్ధాంతాలపైనా..పోరాట పంథాపైనా రామ్ మనోహర్ లోహియా సిద్ధాంతాలు, ఆలోచన
ప్రభావం ఉందన్నారు. ఎలుగెత్తు… ఎదిరించు.. ఎన్నుకో… అనే జనసేన పోరాట
విధానానికి శ్రీ రామ్ మనోహర్ లోహియా సిద్ధాంతాలే స్ఫూర్తి.
కులాలను కలిపే ఆలోచనా విధానం అనేది జనసేన సిద్ధాంతాల్లో ఒకటి. లోహియా చెప్పిన
విధంగా కులాల మధ్య అంతరాలు తగ్గించడం వర్తమాన సమాజానికి ఎంతో శ్రేయస్కరం.
ఆంధ్రప్రదేశ్ కుల వ్యవస్థపై లోహియాకి సాధికారత ఉంది. ఆయన ఇక్కడి కుల విధానాలు
గురించి చెబుతూ రాజ్యాధికారానికి దూరంగా ఉన్న కులాలు ఏ విధంగా ముందుకు
వెళ్లాలో ‘ది క్యాస్ట్ ఇన్ ఇండియా’ పుస్తకంలో వివరించారు. కేవలం కుల
వ్యవస్థపైనే కాదు మహిళా సాధికారతతో భారతీయ సమాజ వికాసం గురించి కూడా ఎంతో
విపులంగా చెప్పారు. లోహియా సిద్ధాంతాలు ప్రతిపాదించడమే కాదు వాటిని తన ప్రజా
జీవితంలో ఆచరించి చూపారు. వర్తమాన సమాజం.. ముఖ్యంగా యువత లోహియా సిద్ధాంతాలు
అర్థం చేసుకొంటే కులాల సంక్లిష్టత నుంచి బయటపడవచ్చని జనసేన అధ్యక్షుడు పవన్
కళ్యాణ్ పేర్కొన్నారు.
